تيتة ماتت !!

كان يوم رهيب ..

كنت آخر حد سلم عليها وباسها ..
للأسف اتلخبط ومعرفتش اقولها كلمة واحدة !
كنت عايزة اقولها حاجات كتير .. سلميلي على جدو.. مع السلامة يا تيتة .. هتوحشيني اوي ..
بس معرفتش

كانت أًصعب لحظة عدت علي في حياتي كلها .. لأنها اول مرة اشوف حد من اهلي ميت .. واسلم عليه ..

تيتة كانت أم للكل ..
أطيب ست ممكن تتولد ..
وأطيب جدة .. وأحن ام .. كانت بتقلق علينا كلنا .. وبتسأل علينا كلنا .. حتى وحنا بعاد عنها وبينا أميال .. وبلاد .. برده بتسأل علينا وعلى التفاصيل اللي أقرب الناس ممكن ينسوها عنك ..
تيتة كانت كريمة اوي .. كل مانروح لها لازم يكون عندها الأكل .. وتغرف وتحطلنا وتحلف علينا لازم ناكل .. حتى لو كنا واكلين ومتغديين ..
كان بيتها مبيخلاش من الخير أبدا .. وكانت بتخدم نفسها بنفسها وممرضتش إلا قليل اوي ..
وأصعب مرض هو مرض الموت اللي جالها من اسبوعين .. ابتدى من 17 رمضان .. وماتت تاني أيام العيد .. ساعة أذان العصر ..
والمغرب كانت بتتدفن ! ..
جنازتها مكنتش تشوف اولها من آخرها ..
كنت واقفة مع مامتي وخالتي .. هم بيعيطوا .. ومش مصدقين ان التابوت اللي هيخرج دلوقتي من المسجد متشال عالاكتاف فيه امهم ..
ولا انا كنت مصدقة ..
شفته بيبعد .. وبنفس التعبير " بيتمختر " .. وبسرعة اوي .. كانت تيتة اتدفنت .. وراحت لربها .. كانت مستعجلة عالجنة ..
كتير اوي بيستنوا .. وبيباتوا لتاني يوم .. انما هي لأ .. الجنة كانت مشتاقلها .. غابت عنها كتير .. 76 سنة ..

الطيبة في عينيها .. ولما بتبتسم وبتضحك .. حنية الدنيا فيها ..
ربنا يرحمها ويسكنها فسيح جناته .. وينور قبرها ويجعله روضة من رياض الجنة .. ويزيده نور على نور ..

تيتة.. كان اسمها نور ..