احنا أساسا نستاهل !
قاعدين طول السنة بنلعب ( مش اوي يعني ) ومقضينيها ميكس جريل .. وفسح مع اصحابنا ...
حكاوي ودردشة لف ودوران .. المهم جت الامتحانات في الآخر
هسسسسس!
فين الناس !
وإذ فجأتن .. متلاقيش حد حواليك .. كل واحد مشغول في اللي وراه .. اللي بيذاكر لأول مرة .. واللي بيراجع عاللي بيحشيه طول السنة .. واللي واللي
ما علينا .. المهم عندنا فرصة 6 ايام للمذاكرة وكمان مش عاجب .. عفوا .. أقصد مش مكفي
لازم نقضي يومين لعب ويومين اطلاع عالمنهج .. وبعدين آخر يومين بقى الضغط اللي بحق وحقيقي
طب ده ليه !!!
متعرفش ... ومش لازم نعرف .. أهي ماشية .. بنذاكر وبننجح ( الله جاب الله خد الله عليه العوض ) وبتخلص السنة ونقضي صيف لذيــــــــــــــــــــــــــــــذ بكل معنى الكلمة ... خصوصا خصوصا .. لما تظهر النتيجة
أحلى الليالي وحياة عينية ..
على رأي واحد صاحبنا : يللا خير خير
أسيبكم بقى عشان العضوية ..
مش عضوية نادي النيل .. دي مادة الكيمياء العضوية أجاركم الله وشفاكم وعافاكم ..
هي أقدار .. بتلف عالجميع
وسالمين
هناك 4 تعليقات:
قاعدين طول السنة بنلعب ( مش اوي يعني ) ومقضينيها ميكس جريل .. وفسح مع اصحابنا ...
ايه الأفترا ده
لعب وفسح
وايه المكس جريل ده كمان
تلاقيه قهوه من اللي بيقعدوا عليها العيال الفافي بتوع صيدله
هههههههههههههههههههههههههههههه
ربنا يوفقك بقى
ركزي في المذاكره
سلااااااااااااااااااااااام
بالزمة يا شنكوتي ده تعليق عيال فافي وصيدلة طيب هترد عليك تقولك ايه
هي بتكتب خواطر وعلي فكرة ممكن تكون بتكتب لنفسها يعني لا عايزاني لا انا ولا انت بس ماعلينا
والمكس جريل ده مطعم ساندويتشات لحوم في قلب جامعه المنصورة
"هي بتكتب خواطر وعلي فكرة ممكن تكون بتكتب لنفسها يعني لا عايزاني لا انا ولا انت بس ماعلينا "
لالالالالا .. متقولش كده يا باشمهندس . .ازاي بس .. انتم عالعين والراس طبعا .. لكن لكل واحد أسلوبه في الكتابة بقى :) .. واتمنى تجددوا الزيارة من تاني .. وواضح انك من المنصورة .. مش كده
انا قصدي ان في بعض الحاجات كلنا بنكتبها لنفسنا اكتر من انها للناس زي خواطرنا الخاصة وبعضها مش بيتنشر وبعضها بيتنشر بس بيبقي فضفضة
ايوة منها وبدرس ف هندستها
ههههههههههه
خالص تحياتي
إرسال تعليق