الحياة ماشية ..عشان لازم تمشي

سألت نفسك قبل كده .. أنا ليه بيحصل معايا كل ده ؟؟
أكيد ..
وأكيد كانت الإجابة حاجة من دول ..
يا إما انت فاشل اصلا وتستاهل ده كله .. أو حظك الاسود هو اللي حطك في الظروف دي .. أو هي بايظة بايظة .. أو مفيش حاجة عدلة اشمعنا حياتك اللي هتتعدل !! .. واشكال من دي ..

طيب ليه ؟! !!؟؟؟!!! ! ؟!! ؟!! ! ؟

مش مجرد اننا بنواجه صعوبات معينة خلال بعض ايام حياتنا .. يبقى حياتنا كلها مآسي ..
والمفروض منبصلهاش أبدا من الناحية دي ..
لأن الحياة فيها حاجات جميلة ..

طب ما تيجوا نسأل نفسنا الأسئلة دي لما نحس باكتئاب أو خنقة ! ...
إذا كانت الحياة مآسي ليه ربنا خلى الطبيعة في منتهى الجمال بالشكل ده ؟
طيب ليه خلى أصوات الطيور جميلة ولما تسمعها بتفرح ؟
طيب ليه عملك البحر اللي لما بتقعد عليه او بتعوم فيه بتحس بهدوء وكأنك من غير اي مشاكل .. ؟
بلاش دول .. وننزل لأرض الواقع ...
ليه لما بنعيط مبنقدرش نعيط ساعة كاملة بشكل مستمر ؟؟
وليه واحنا في عز الاكتئاب لو اتقالت ادامنا نكتة ممكن نضحك ؟؟
طيب ليه لما بنفرح بخبر أو موقف أو أي حاجة .. بننساه في نفس اليوم .. ومبنصحاش اليوم اللي بعده واحنا لسه فاكرينه !! ؟

طيب ما تيجوا نسأل نفسنا السؤال ده ..
مين بيعكنن علينا لما بنكون لوحدنا ؟
احنا .. ولا حد تاني ؟؟

اللي بيخلينا نتجاهل كل الجمال اللي حوالينا .. اننا لما بنختلي بنفسنا .. بنقلب في القديم والجديد .. والجديد والقديم .. ومنسيبش مشكلة ولا مصيبة الا لما نفكر فيها ونفتكرها !
نفتكر الكلمة الفلانية .. والمقلب الفلاني .. والأزمة العلانية .. و موت فلان .. والخناقة مع فلانة ..

انما لو فكرنا واحنا قاعدين لوحدنا .. نستمتع بالهدوء .. ونفكر في أجمل حاجة حصلت في حياتنا .. وأجمل حاجة نتمنى تحصل بعدين ..
يبقى هنحس بإن حياتنا مش مأساة مستمرة .. وبإنها مهما احتوت من مشاكل ومصاعب .. نعمة من عند ربنا ولازم نحافظ عليها .. ونستمتع بكل دقيقة فيها ..

مهو كمان لازم نكون عارفين .. ان الحياة ماشية ..
عشان لازم تمشي !

|شوية حاجات |

ايوة ساعات ..

بتوه واضيع وانسى اللي فات ..

بس افتكر بعض الحاجات

ممكن كتير احس اني لوحدي لكن ..

كل الاماكن ..

كان فيها حد كان جنبي ومات ..

بقى ذكريات

وساعات بكون ..

عايزة السكون ..

والقاه هناك ..وسط الصحاري والغابات

اي مكان .. بعيد بعيد عن البشر ..

بقوا من جماد .. وقلوب حجر !

دايما بتوه .. وارجع هنا لنفس المكان ..

بغرق كتير ..

وياخدني موج الحزن للضعف المرير ..

لكن بفوق من تاني .. وارجع

وارجع اشوف ..

نور من السما .. بالليل بيسطع

نور ربنا ..

جوه القلوب ..

يدخل يادوب ..

تلقى الحياة اجمل وابدع !